ٹوبہ میں اندروں شہر ہیوی ٹریفک کا داخلہ بند نہ ہو سکا شہری پریشان

اندرون شہر ہیوی ٹریفک کا داخلہ بند نہ ہونے سے ٹریفک کے مسائل میں اضافہ ہو گیا، سڑکیں بھی ٹوٹ پھوٹ کا شکار ہو گئیں، تحصیل انتظامیہ اور ٹریفک پولیس کے اہلکاروں نے آنکھیں موند لیں۔ تفصیلات کے مطابق دن کے اوقات میں اندرون شہر بڑی گاڑیوں کا داخلہ ممنوع قرار دیا گیا ہے لیکن ٹوبہ میں مسافر اور مال بردار گاڑیاں سارا دن اندرون شہر سے گزرتی ہیں جس کے باعث نہ صرف ٹریفک کے مسائل جنم لیتے ہیں بلکہ سڑکیں بھی ٹوٹ پھوٹ کا شکار ہو چکی ہیں اور ان پر پڑنے والے گڑھے حادثات کا سبب بنتے رہتے ہیں۔ اس سلسلے میں گفتگو کرتے ہوئے شہریوں نے کہا کہ انتظامیہ کو متعدد بار صورت حال سے آگاہ کیا گیا لیکن کوئی ایکشن نہیں لیا گیا جبکہ ٹریفک پولیس کے اہلکار بھی سارا دن لوگوں کی مشکلات سے لطف اندوز ہوتے رہتے ہیں۔ انہوں نے کمشنر اور ایس پی ٹریفک فیصل آباد سے مطالبہ کیا کہ وہ ذاتی دلچسپی لے کر مسئلہ فی الفور حل کرائیں تاکہ لوگ حادثات اور ٹریفک کے مسائل سے نجات پا سکیں۔ -