عیدالفطر: ریلوے سٹیشنوں پر حفاظتی انتظامات سخت کرنے کی ہدایت

عید الفطر پر سپیشل عید ٹرینوں کی آمد و رفت کے دوران ریلوے سٹیشنوں پر حفاظتی انتظامات سخت کرنے کی ہدایت کی گئی ہے۔ انسپکٹر جنرل پولیس پاکستان ریلویز کے خصوصی احکامات پر ریلوے پولیس کو ہائی الرٹ کر دیا گیا ہے۔ پاکستان ریلوے پولیس کے ترجمان کا کہنا ہے کہ عید الفطر کے ایام میں کسی بھی شر پسندی کے خدشہ سے نمٹنے کے لئے تمام اہم ریلوے اسٹیشنوں پر ریلوے پولیس کے اہلکاروں کی خصوصی ڈیوٹیاں لگا دی گئی ہیں۔ انہوں نے کہا کہ ٹرینوں کے ہمراہ بھی سکیورٹی سٹاف تعینات کر دیا گیا ہے۔ سکیورٹی انتظامات کا مقصد ٹرینوں کے ذریعے سفر کرنے والے مسافروں کو مکمل تحفظ کی فراہمی یقینی بنانا ہے۔ ترجمان نے عوام سے اپیل کی ہے کہ وہ عید کے ایام میں سکیورٹی کے حوالے سے پاکستان ریلوے کے عملہ اور ریلوے پولیس سے بھر پور تعاون کریں۔